ហ៊ុន សែន ឆ្លើយ​តប​ទៅ​សភា​អឺរ៉ុប​និង​ប្រតិកម្ម​របស់ សម រង្ស៊ី

ដោយ ម៉ៅ សុធានី

ឆ្លើយ​តប​ទៅ​នឹង​ករណី​តំណាងរាស្ត្រ​គណបក្ស សម រង្ស៊ី ១៧​រូប ដែល​សុំ​ឲ្យ​ប្រធាន​សភា​ជាតិ ​ស្នើ​​​ឲ្យ​ប្រមុខ​រាជ​រដ្ឋាភិបាល​ទៅ​ឆ្លើយ​បំភ្លឺ​នូវ​សេចក្ដី​សម្រេច​ របស់​សភា​អឺរ៉ុប ស្ដីពី​ករណី​លោក សម រង្ស៊ី លោក​នាយករដ្ឋមន្ត្រី ហ៊ុន សែន បាន​ថ្លែង​បញ្ជាក់​តាម​លិខិត ៣​ទំព័រ ចុះ​ថ្ងៃ​​២ វិច្ឆិកា ឆ្នាំ​២០១០ ផ្ញើ​ជូន​លោក ហេង សំរិន ប្រធាន​សភា​ជាតិ​ថា ការ​សម្រេច​របស់​សភា​អឺរ៉ុប ចុះ​ថ្ងៃ​២១ តុលា ស្ដីពី​កម្ពុជា ជា​ពិសេស​ករណី សម រង្ស៊ី គឺ​គ្រាន់​តែ​ជា​ការ​បញ្ចេញ​ទស្សនៈ​តែប៉ុណ្ណោះ។

RFA Photo

លោក​នាយករដ្ឋមន្ត្រី ហ៊ុន សែន (ឆ្វេង) និង​លោក សម រង្ស៊ី ប្រធាន​គណបក្ស សម រង្ស៊ី

រដ្ឋាភិបាល​កម្ពុជា ចាត់​ទុក​ថា ការ​សម្រេច (resolution) នោះ គឺ​ខ្វះ​ព័ត៌មាន និង​ខ្វះ​ទំនាក់ទំនង​ជាមួយ​រដ្ឋាភិបាល​នៃ​បណ្ដា​ប្រទេស​សមាជិក​សហភាព​អឺរ៉ុប ដែល​មាន​ស្ថានទូត​នៅ​កម្ពុជា ដូច្នេះ​រដ្ឋាភិបាល​កម្ពុជា នៃ​រដ្ឋ​ឯករាជ្យ អធិបតេយ្យ ពុំ​មាន​កាតព្វកិច្ច​អ្វី​ដែល​ត្រូវ​ចាត់​វិធានការ ធ្វើ​តាម​សភា​អឺរ៉ុប​នោះ​ទេ។

លោក​នាយករដ្ឋមន្ត្រី ហ៊ុន សែន បាន​បញ្ជាក់​ដែរ​ថា គោល​ជំហរ​របស់​រដ្ឋាភិបាល​កម្ពុជា ដើម្បី​រក្សា​ជំនួយ​ពី​សហភាព​អឺរ៉ុប ក៏​ដូច​ជា​បណ្ដា​ប្រទេស​ដទៃ គឺ​ឈរ​លើ​ការ​ពង្រឹង​ជំនឿ​ទុក​ចិត្ត ផ្អែក​លើ​គោលការណ៍​គោរព​ផលប្រយោជន៍​គ្នា​ទៅ​វិញ​ទៅ​មក ជា​ពិសេស​សិទ្ធិ​ស្វ័យ​សម្រេច​របស់​ប្រជាជាតិ​នីមួយៗ។

នៅ​ក្នុង​កិច្ចការ​បំពេញ​ជូន​ប្រជាជាតិ រដ្ឋាភិបាល​កម្ពុជា ពុំ​បាន​ចាត់​ទុក​ថា ជា​ការ​ធ្វើ​តម្រូវ​បរទេស ភ្លេច​អធិបតេយ្យ​ជាតិ និង​សតិសម្បជញ្ញៈ​ជាតិ​ជា​ដាច់​ខាត ហើយ​ក៏​ពុំ​បាន​ចាត់​ទុក​ថា កម្ពុជា​ស្ថិត​នៅ​ក្រោម​ការ​ឃ្លាំ​មើល​ពី​សហគមន៍​អន្តរជាតិ​ឡើយ។

ចំពោះ​ការ​លើក​ឡើង​ខាង​លើ​របស់​លោក​នាយករដ្ឋមន្ត្រី ហ៊ុន សែន លោក សម រង្ស៊ី ប្រធាន​គណបក្ស សម រង្ស៊ី ដែល​កំពុង​និរទេស​ខ្លួន​នៅ​ក្រៅ​ប្រទេស បាន​មាន​ប្រតិកម្ម​តប​មក​វិញ​ថា ទង្វើ និង​ការ​ឆ្លើយ​តប​របស់​លោក ហ៊ុន សែន នឹង​នាំ​ឲ្យ​កម្ពុជា បាត់បង់​កិត្តិយស និង​សេចក្ដី​ថ្លៃថ្នូរ​របស់​ប្រទេស​ជាតិ។

លោក សម រង្ស៊ី មាន​ប្រសាសន៍​បន្ថែម​ថា ៖ «ចម្លើយ​របស់​រដ្ឋាភិបាល​ ទីក្រុង​ភ្នំពេញ បង្ហាញ​ឲ្យ​ឃើញ​ថា រដ្ឋាភិបាល​មិន​យល់ ហើយ​មិន​គោរព​គោលការណ៍​លទ្ធិប្រជាធិបតេយ្យ​ទាល់​តែ​សោះ។ សភា​អឺរ៉ុប​គេ​បាន​ធ្វើ​សំណើ​ទៅ​រដ្ឋាភិបាល​ទីក្រុង​ភ្នំពេញ សព្វថ្ងៃ ឲ្យ​រក​ដំណោះស្រាយ​ស្រប​តាម​គោលការណ៍​លទ្ធិប្រជាធិបតេយ្យ សេរី ពហុ​បក្ស ហើយ​រដ្ឋាភិបាល​ហ្នឹង​គឺ​មិន​យល់​អ្វី​ទាល់​តែ​សោះ បាន​ឆ្លើយ​តប​យ៉ាង​កម្រោល។ ចម្លើយ​បែប​នេះ​នឹង​ធ្វើ​ឲ្យ​គេ​មើល​ងាយ​រដ្ឋាភិបាល​លោក ហ៊ុន សែន កាន់តែ​ខ្លាំង​ឡើង​ថែម​ទៀត ធ្វើ​ឲ្យ​ប្រទេស​កម្ពុជា​យើង​បាត់​បង់​កិត្តិយស ពីព្រោះ​ការ​ឆ្លើយ​តប​បែប​នេះ គឺ​ឆ្លើយ​តប​មិន​សម​ហេតុ​សម​ផល​ទាល់តែ​សោះ»

ទេសចរ​បរទេស​មក​កម្ពុជា​កើន​ឡើង​ក្នុង​អំឡុង​ពេល ​៩​ខែ​ចុង​ឆ្នាំ​២០១០

ដោយ គឹម ពៅ

ប្រភព​ពី​ក្រសួង​ទេសចរណ៍​បាន​ឲ្យ​ដឹង​ថា ភ្ញៀវ​ទេសចរណ៍​បរទេស​ដែល​បាន​ចូល​មក​លេង​ក្នុង​ប្រទេស​កម្ពុជា បាន​កើន​ឡើង​ជិត ១៥% នៃ​រយៈ​ពេល ៩​ខែ​ចុង​ក្រោយ​នេះ ក្នុង​ឆ្នាំ​២០១០ បើ​ប្រៀបធៀប​ទៅ​នឹង​រយៈពេល​ដដែល កាល​ពី​ឆ្នាំ​២០០៩ កន្លង​ទៅ។

RFA/Hang Savyouth

ទេសចរ​បរទេស​ដើរ​ឆ្លង​ស្ពាន​ហាល ដើម្បី​ទៅ​ទស្សនា​ប្រាសាទ​អង្គរវត្ត ស្ថិត​នៅ​ក្នុង​ខេត្ត​សៀមរាប កាល​ពី​ថ្ងៃ​ទី​៣១ ខែ​តុលា ឆ្នាំ​២០១០។

http://flash-mp3-player.net/medias/player_mp3_maxi.swfរដ្ឋមន្ត្រី​ក្រសួង​ទេសចរណ៍ លោក ថោង ខុន មាន​ប្រសាសន៍​ថា កាល​ពី​ឆ្នាំ​ទៅ ភ្ញៀវ​សរុប​ដែល​ចូល​មក​លេង​ក្នុង​ប្រទេស​កម្ពុជា មាន​ប្រហែល ១,៦​លាន​នាក់ ប៉ុន្តែ​វា​បាន​កើន​ឡើង​មក​ដល់ ១,៨​លាន​នាក់​ហើយ ក្នុង​រយៈ​ពេល ៩​ខែ​ចុង​ក្រោយ​នៃ​ឆ្នាំ​២០១០​នេះ។

ភ្ញៀវ​ទេសចរណ៍​វៀតណាម ដែល​មាន​ចំនួន​ប្រហែល ៣០​ម៉ឺន​នាក់ បាន​នាំ​មុខ​គេ​ក្នុង​ចំណោម​ភ្ញៀវ​ទេសចរណ៍​បរទេស​ទាំង​អស់​នៅ​ក្នុង​ឆ្នាំ​ នេះ ហើយ​បន្ទាប់​មក​មាន​ភ្ញៀវ​កូរ៉េ ចិន និង​ភ្ញៀវ​អូស្រ្តាលី ផង​ដែរ។

លោក​រដ្ឋមន្ត្រី​ក្រសួង​ទេសចរណ៍ ថោង ខុន បញ្ជាក់​អំពី​មូលហេតុ​នៃ​កំណើន​ភ្ញៀវ​ទេសចរណ៍​ដូច្នេះ ៖ «និយាយ​ឲ្យ​ខ្លី ​ទៅ យើង​មាន​គោលដៅ​ទេសចរណ៍​សម្រាប់​ទស្សនា​ធំៗ​ច្រើន។ មាន​អង្គរវត្ត មាន​តំបន់​ឆ្នេរ មាន​តំបន់​អេកូ​ទេសចរណ៍ មាន​ទីក្រុង​ភ្នំពេញ។ តំបន់​អេកូ​ទេសចរណ៍​មាន​ភូមិឋាន មាន​ទាំង​ភូមិ​ភាគ​និរតី ហើយ​សព្វថ្ងៃ​ហ្នឹង គឺ​សុទ្ធ​តែ​ទៅ​ទស្សនា​បាន​ទាំង​អស់។ អ្នក​ណា​ចង់​មើល​អង្គរ មើល​អង្គរ​ទៅ អ្នក​ណា​ចង់​មើល​ផ្សោត​មើល​ផ្សោត​ទៅ ហើយ​អ្នក​ចង់​ទៅ​មើល​ព្រៃ​កោងកាង ទៅ​មើល​កោះកុង ក៏​ទៅ​មើល​ទៅ ហើយ​ពិសេស​ទៅ​ទៀត យើង​មាន​ប្រព័ន្ធ​ផ្លូវ​ថ្នល់​បាន​ស្រួល ហើយ​សន្តិសុខ​ធានា​បាន​ល្អ។ ទី​២ គឺ​ដោយសារ​សេដ្ឋកិច្ច​ងើប​ឡើង​វិញ ពិសេស​នៅ​អាស៊ី»

ប្រភព​ដដែល​បាន​ឲ្យ​ដឹង​ទៀត​ថា កំណើន​នៃ​ភ្ញៀវ​ទេសចរណ៍​ដែល​ធ្វើ​ដំណើរ​តាម​ជើង​យន្តហោះ​មាន​ការ​កើន​ឡើង​ ទាំង​នៅ​ទីក្រុង​ភ្នំពេញ និង​នៅ​សៀមរាប។

ក្នុង​រយៈ​ពេល ៩​ខែ​ចុង​ក្រោយ​នេះ ការ​ធ្វើ​ដំណើរ​តាម​យន្តហោះ តាម​រយៈ​អាកាស​យានដ្ឋាន​អន្តរជាតិ​ភ្នំពេញ ទទួល​បាន​ភ្ញៀវ​ជាង ៤​សែន​នាក់ គឺ​មាន​ការ​កើន​ឡើង​ចំនួន ១១% នៃ​ឆ្នាំ​ចាស់ ហើយ​តាម​រយៈ​អាកាស​យានដ្ឋាន​អន្តរជាតិ​សៀមរាប​វិញ ទទួល​បាន​ភ្ញៀវ​ជិត ៥​សែន​នាក់ គឺ​មាន​ការ​កើន​ឡើង​ចំនួន ១៧% នៃ​ឆ្នាំ​ចាស់។

ភ្ញៀវ​ទេសចរណ៍​ចំនួន ៥០% បាន​ចូល​ទៅ​ទស្សនា​តំបន់​ប្រាង្គ​ប្រាសាទ​អង្គរ ហើយ​សល់​ពី​នោះ​បាន​ចូល​ទៅ​កម្សាន្ត​នៅ​តំបន់​ឆ្នេរ តំបន់​ធម្មជាតិ​ព្រៃ​ភ្នំ​នៃ​ភាគ​ឦសាន​ប្រទស តំបន់​ព្រៃ​កោងកាង និង​ចូល​មក​ទីក្រុង​ភ្នំពេញ។

របាយការណ៍​ស្ដី​អំពី​កំណើន​ភ្ញៀវ​ទេសចរណ៍ បាន​និយាយ​អំពី​កំណើន​សេដ្ឋកិច្ច​ ដោយសារ​តែ​កំណើន​ភ្ញៀវ​ទេសចរណ៍​ផង​ដែរ។ ប្រភព​ដដែល​បាន​បញ្ជាក់​អំពី​ចំណូល​ដែល​បាន​មក​ពី​វិស័យ​ទេសចរណ៍​មាន​ចំនួន​ ចន្លោះ​ពី ១០ ទៅ ១២% នៃ​ផល​ទុន​សរុប​ក្នុង​ស្រុក​នៅ​ក្នុង​ប្រទេស​កម្ពុជា ដែល​មាន​ចំនួន​ប្រហែល ១១​ពាន់​លាន​ដុល្លារ​ក្នុង​មួយ​ឆ្នាំៗ។

ជាមួយ​គ្នា​នឹង​ការ​កើន​ឡើង​នៃ​ចំនួន​ភ្ញៀវ​ទេសចរណ៍​នេះ ប្រធាន​សមាគម​សេដ្ឋកិច្ច​ក្រៅ​ប្រព័ន្ធ លោក វ៉ន ពៅ បាន​រិះគន់​ថា កំណើន​ភ្ញៀវ​មាន​មែន ប៉ុន្តែ​វា​មិន​បាន​ធ្លាក់​ចូល​ទៅ​ក្នុង​ចំណូល​រដ្ឋ​ទាំង​ស្រុង និង​ហោប៉ៅ​របស់​ប្រជាពលរដ្ឋ​ច្រើន​ឡើយ ដោយសារ​តែ​ក្រុមហ៊ុន​យន្តហោះ ក្រុមហ៊ុន​រថយន្ត ក្រុមហ៊ុន​វិនិយោគ សណ្ឋាគារ និង​កន្លែង​កម្សាន្ត​ធំៗ សុទ្ធ​តែ​ជា​របស់​ក្រុមហ៊ុន​បរទេស។

លោក វ៉ន ពៅ អះអាង​ថា ជីវភាព​របស់​ប្រជាពលរដ្ឋ​រក​ស៊ី​វិស័យ​ទេសចរណ៍ មិន​មាន​ការ​រីក​ចម្រើន​ធូរធារ​ឡើយ បើ​ទោះ​បី​ជា​កំណើន​ភ្ញៀវ​ទេសចរណ៍​នោះ​កើន​ឡើង​ក៏ដោយ ៖ «កើន​ឡើង​មាន​តែ​ ភ្ញៀវ​កូរ៉េ ភ្ញៀវ​វៀតណាម ភ្ញៀវ​ចិន ហើយ​អា​ពួក​អស់​ហ្នឹង​គេ​មិន​មែន​ជិះ​រ៉ឺម៉ក​ទេសចរណ៍​ទេ គេ​មក​គេ​ជិះ​រថយន្ត​ក្រុមហ៊ុន​របស់​គេ គឺ​ជនជាតិ​គេ​ដដែល​ហ្នឹង ដូច្នេះ​រឿង​ហ្នឹង​លុយ​មិន​បាន​ធ្លាក់​មក​លើ​ខ្មែរ​ទេ។ ពួក​ហ្នឹង​គេ​មក​លេង​ស្រុក​ខ្មែរ ប៉ុន្តែ​ទម្លាក់​លុយ​មក​ស្រុក​ខ្មែរ​តែ​មក​លើ​អាជ្ញាធរ​អប្សរា លុយ​ទិញ​សំបុត្រ ប៉ុន្តែ​លុយ​សម្រាប់​ប្រជាពលរដ្ឋ​តូចតាច​មាន​ការ​កើន​ឡើង​ស្អី។ បើ​វៀតណាម​មក រថយន្ត​ក៏​របស់​វៀតណាម បើ​កូរ៉េ​មក រថយន្ត​របស់​កូរ៉េ ផ្ទះ​សំណាក់​ក៏​កូរ៉េ ស្អី​ក៏​កូរ៉េ ខ្មែរ​វា​អត់»

អ្នក​រត់​រ៉ឺម៉ក​ម៉ូតូ​កង់​បី​សម្រាប់​ដឹក​ភ្ញៀវ​ទេសចរណ៍​នៅ​សៀមរាប​វិញ ឈ្មោះ លី កិត្យា ថ្ងូរ​ថា ឆ្នាំ​នេះ​កាន់​តែ​ពិបាក​រក​ជាង​ឆ្នាំ​មុនៗ​ទៅ​ទៀត ដោយសារ​តែ​មិន​សូវ​សំបូរ​ភ្ញៀវ​ទេសចរណ៍​អឺរ៉ុប ៖ «អ្នក​រត់​រ៉ឺម៉ក​កាន់​ តែ​កើន​ឡើង។ អ្នក​ខ្លះ​ឈប់​ពី​ការងារ​នៅ​តាម​សណ្ឋាគារ ហើយ​បាន​មក​រត់​រ៉ឺម៉ក ដូច្នេះ​អ្នក​រត់​កើន​ឡើង ឯ​ភ្ញៀវ​វិញ​មក​ផ្នែក​រាយ​វិញ​គឺ​ភាគ​តិច»

អ្នក​រត់​ម៉ូតូ​រ៉ឺម៉ក​ម្នាក់​ទៀត​បន្ថែម ៖ «ភ្ញៀវ​អឺរ៉ុប ភ្ញៀវ​រាយ​បាន​ទៅ​ទន្លេ​ត​ទៅ​អី ទៅ​ម៉ាស្សា​ទៅ​អី បើ​ភ្ញៀវ​ទួរ (ភ្ញៀវ​របស់​ក្រុមហ៊ុន​ទេសចរណ៍) អត់​បាន​អី​ទេ ជិះ​តែ​ឡាន»

រី​ឯ​អ្នក​គ្រប់គ្រង​នៅ​សណ្ឋាគារ​អប្សរា​ខេត្ត​សៀមរាប​វិញ អ្នកស្រី ចាន់ ឌី បញ្ជាក់​ស្រដៀង​គ្នា​ដែរ​ថា ភ្ញៀវ​នៅ​សណ្ឋាគារ​របស់​អ្នកស្រី​មាន​ការ​កើន​ឡើង តែ​មិន​សូវ​បាន​ចំណូល​ប៉ុន្មាន​ទេ ៖ «មាន​ចំណូល​ដែរ ប៉ុន្តែ​មិន​សូវ​ច្រើន​ទេ ពីព្រោះ​ភ្ញៀវ​គេ​មិន​សូវ​ចាយ​ដែរ»

អ្នក​តំណាងរាស្ត្រ​គណបក្ស​ប្រឆាំង សម រង្ស៊ី លោក សុន ឆ័យ ជឿ​ថា ចំណូល​ដែល​បាន​មក​ពី​ភ្ញៀវ​ទេសចរណ៍​អាស៊ី ទាប​ជាង​ចំណូល​ដែល​បាន​ពី​ភ្ញៀវ​ទេសចរណ៍​ពី​អឺរ៉ុប ដោយសារ​តែ​ការ​ចំណាយ​ក្នុង​ដំណើរ​កម្សាន្ត​របស់​ភ្ញៀវ​អាស៊ី ភាគ​ច្រើន​បាន​ធ្លាក់​ទៅ​លើ​ក្រុមហ៊ុន​របស់​ពួកគេ​ទាំង​អស់​វិញ ដូចជា​តម្លៃ​យន្តហោះ រថយន្ត​ដឹក​អ្នក​ទេសចរណ៍ ភោជនីយដ្ឋាន និង​សណ្ឋាគារ​ជាដើម។

លោក​បន្ត​ថា ចំណូល​របស់​រដ្ឋ ក៏​ដូច​ជា​ចំណូល​ប្រចាំ​ថ្ងៃ​របស់​ពលរដ្ឋ​ឡើង​ខ្ពស់ ដោយសារ​តែ​វិស័យ​ទេសចរណ៍ ល្គឹកណា​វិស័យ​ទេសចរណ៍​របស់​ខ្មែរ​បាន​ចាប់​យក​នូវ​ចំនួន​ដ៏​ច្រើន​លើសលប់​ នៃ​ទេសចរណ៍​អឺរ៉ុប។

របាយការណ៍​របស់​ក្រសួង​ទេសចរណ៍​ដដែល​បាន​ឲ្យ​ដឹង​ថា ចំនួន​ទេសចរណ៍​ដែល​ចូល​មក​កម្សាន្ត​នៅ​ក្នុង​ប្រទេស​កម្ពុជា មាន​ចំនួន ៧០% មក​ពី​តំបន់​អាស៊ី​ប៉ាស៊ីហ្វិក ២០% មក​ពី​តំបន់​អឺរ៉ុប និង ១០% មក​ពី​អាមេរិក។

ក្រសួង​ទេសចរណ៍​បាន​រំពឹង​ថា ចំនួន​ភ្ញៀវ​ទេសចរណ៍​នឹង​កើន​ឡើង​ដល់ ២,៤​លាន​នាក់ នៅ​ចុង​ឆ្នាំ​២០១០​នេះ៕

កម្ពុជា-​ថៃ​ចុះ​កិច្ច​ព្រមព្រៀង​ស្ដីពី​ សន្តិសុខ​នៅ​តាម​ព្រំដែន

ដោយ សុខ សេរី

មន្ត្រី​យោធា​ជាន់​ខ្ពស់​កម្ពុជា និង​ថៃ បាន​ឯកភាព​គ្នា​ថែម​មួយ​កម្រិត​ទៀត កាល​ពី​ចុង​ខែ​តុលា ថ្មីៗ​នេះ ដើម្បី​ធ្វើ​ឲ្យ​មាន​ភាព​ប្រក្រតី​ក្នុង​ទំនាក់​ទំនង​ល្អ​ជាមួយ​គ្នា ប៉ុន្តែ​វត្តមាន​កងទ័ព​ថៃ ឈ្លាន​ពាន​កម្ពុជា នៅ​តែ​មាន​បន្ត​នៅ​វត្ត​កែវសិក្ខាគិរីស្វារៈ​ជា​ដដែល។

RFA file photo/Savyuth

ទាហាន​ថៃ​ដើរ​នៅ​ក្បែរ​ប្រាសាទ​ព្រះវិហារ​នា​ ថ្ងៃ​១៩ កក្កដា ២០០៨។

http://flash-mp3-player.net/medias/player_mp3_maxi.swfមន្ត្រី​ជាន់​ខ្ពស់​យោធា​កម្ពុជា បាន​ឲ្យ​ដឹង​នៅ​ថ្ងៃ​ទី​៣ ខែ​វិច្ឆិកា​ថា រដ្ឋមន្ត្រី​ក្រសួង​ការពារ​ជាតិ​កម្ពុជា លោក ទៀ បាញ់ និង​រដ្ឋមន្ត្រី​ក្រសួង​ការពារ​ជាតិ​ថៃ លោក ប្រាវីត វង់ស៊ូវ៉ាន (Prawit Wongsuwan) បាន​ចុះ​ហត្ថលេខា​លើ​កិច្ច​ព្រមព្រៀង​ទ្វេ​ភាគី​មួយ ស្ដីពី​ការ​រក្សា​សន្តិសុខ សន្តិភាព និង​ជៀសវាង​ជម្លោះ​ប្រដាប់​អាវុធ​ជាមួយ​គ្នា​នៅ​តំបន់​ប្រាសាទ​ព្រះវិហារ និង​កន្លែង​ដទៃ​ទៀត នៅ​តាម​បណ្ដោយ​ព្រំដែន​កម្ពុជា-​ថៃ។

កិច្ច​ព្រមព្រៀង​ជា​គោល​នេះ មាន​ចំណុច​សំខាន់ៗ​ចំនួន ១៥​ចំណុច គឺ​ត្រូវ​បាន​ចុះ​ហត្ថលេខា​នៅ​ក្នុង​ជំនួប​ទ្វេ​ភាគី​លើក​ទី​៧ នៅ​ក្នុង​ទីក្រុង​ប៉ាតាយ៉ា (Pattaya) ប្រទេស​ថៃ នៅ​ចន្លោះ​ថ្ងៃ​ទី​២៧ ខែ​តុលា ដល់​ថ្ងៃ​ទី​៣០ ខែ​តុលា កន្លង​ទៅ​ថ្មីៗ​នេះ ដោយ​មាន​ការ​ចូល​រួម​ពី​មន្ត្រី​យោធា​ជាន់​ខ្ពស់​កម្ពុជា និង​មន្ត្រី​គណៈកម្មការ​ព្រំដែន​ទូទៅ​រវាង​កម្ពុជា និង​ថៃ។

លោក​ឧត្ដមសេនីយ៍​ឯក ឈុំ សុជាត ជា​មន្ត្រី​អ្នក​នាំ​ពាក្យ​ក្រសួង​ការពារ​ជាតិ​កម្ពុជា ដែល​ទើប​បាន​វិល​ត្រឡប់​មក​ពី​ការ​ចូល​រួម​ក្នុង​កិច្ច​ប្រជុំ​នោះ បាន​មាន​ប្រសាសន៍​ប្រាប់​វិទ្យុ​អាស៊ី​សេរី នៅ​ថ្ងៃ​ទី​៣ ខែ​វិច្ឆិកា​ថា ភាគី​យោធា​កម្ពុជា និង​ភាគី​យោធា​ថៃ បាន​ឯកភាព​គ្នា និង​បាន​ទទួល​លទ្ធផល​ល្អ​ប្រសើរ​ជាង​កិច្ចប្រជុំ​មុនៗ។

លោក​បាន​បន្ត​ថា ៖ «ដោយសារ​តែ​រដ្ឋមន្ត្រី​ក្រសួង​ការពារ​ជាតិ​ទាំង​២ ជា​ពិសេស​រដ្ឋមន្ត្រី​ក្រសួង​ការពារ​ជាតិ​ថៃ គាត់​បាន​សន្យា​ថា នឹង​ប្រើប្រាស់​យន្តការ​គណៈកម្មការ​កិច្ចការ​ព្រំដែន​ទូទៅ​នេះ ដើម្បី​ដោះស្រាយ​សន្តិសុខ​នៅ​តាម​ព្រំដែន»

កិច្ច​ព្រមព្រៀង​នេះ​ត្រូវ​បាន​គេ​ចាត់​ទុក​ថា ជា​យន្តការ​សំខាន់​ថ្មី​មួយ​ក្នុង​ការ​បន្ធូរបន្ថយ​ស្ថានការណ៍​តានតឹង​នៃ​ ជម្លោះ​ប្រដាប់​អាវុធ តាម​រយៈ​ការ​ចរចា​ប្រឆាំង​អំពើ​ភេរវកម្ម និង​ធ្វើ​សហប្រតិបត្តិការ​រវាង​កម្ពុជា និង​ថៃ លើ​វិស័យ​ពាណិជ្ជកម្ម កសិកកម្ម ទេសចរណ៍ បរិស្ថាន និង​អប់រំ​ជាដើម។

សាកល​សកលវិទ្យាធិការ​នៃ​សាកលវិទ្យាល័យ​ខេមរៈ នៅ​ក្នុង​ប្រទេស​កម្ពុជា លោក​បណ្ឌិត សុខ ទូច អ្នក​វិភាគ​នយោបាយ​នៅ​កម្ពុជា បាន​មាន​ប្រសាសន៍​ថា ដរាប​ណា​វត្តមាន​របស់​កងទ័ព​ថៃ នៅ​វត្ត​កែវសិក្ខាគិរីស្វារៈ គឺ​ជា​សញ្ញា​ជម្លោះ​ព្រំដែន និង​ការ​ឈ្លានពាន​របស់​ថៃ នៅ​តែ​បន្ត​នៅ​ឡើយ។

លោក សុខ ទូច មាន​ប្រសាសន៍​បន្ត​ថា ៖ «ពួក​ដែល​ឈរ​ជើង ដែល​ឈ្លាន​ពាន​ទឹក​ដី​ខ្មែរ​ហ្នឹង​ឲ្យ​វា​ចេញ​ពី​ព្រំដែន កាលណា​វា​អត់​ចេញ​មាន​ន័យ​ថា ទំនាស់​ព្រំដែន​នៅ​មាន​ជា​ធរមាន»

ក្រសួង​ការពារ​ជាតិ​កម្ពុជា នឹង​ធ្វើ​ជា​ម្ចាស់​ផ្ទះ​នៃ​កិច្ចប្រជុំ​លើក​ទី​៨ នៅ​ក្នុង​ទីក្រុង​ភ្នំពេញ នៅ​ឆ្នាំ​២០១១ ខាង​មុខ។ ក្រសួង​ការពារ​ជាតិ​កម្ពុជា និង​ក្រសួង​ការពារ​ជាតិ​ថៃ បាន​ចាប់​ផ្ដើម​ដំណើរការ​ជួប​ប្រជុំ​ចរចា​ទ្វេ​ភាគី​បែប​នេះ​ជា​លើក​ដំបូង​ តាំង​ពី​ឆ្នាំ​១៩៩៥​មក នៅ​រៀងរាល់ ២​ឆ្នាំ​ម្ដង ឬ ៣​ឆ្នាំ​ម្ដង។

នៅ​ក្នុង​ជំនួប​ទ្វេ​ភាគី​លើក​ទី​៣ រវាង​លោក​នាយករដ្ឋមន្ត្រី ហ៊ុន សែន ប្រទេស​កម្ពុជា ជាមួយ​នាយករដ្ឋមន្ត្រី​ថៃ លោក អាភីស៊ិត វេតឆាឈីវ៉ាក់ (Abhisit Vejjajiva) នៅ​ក្នុង​ទីក្រុង​ហាណូយ ប្រទេស​វៀតណាម កាល​ពី​ចុង​ខែ​តុលា ថ្មីៗ​នេះ លោក ហ៊ុន សែន បាន​ស្នើ​សុំ​ឲ្យ​សភា​ថៃ តាម​រយៈ​លោក អាភីស៊ិត វេតឆាឈីវ៉ាក់ ផ្ទល់​សត្យានុម័ត​លើ​កិច្ចព្រមព្រៀង​បណ្ដោះ​អាសន្ន រវាង​កម្ពុជា និង​ថៃ កាល​ពី​ចន្លោះ​ឆ្នាំ​២០០៨ និង​ឆ្នាំ​២០០៩ ដែល​បាន​រាប់​ទាំង​ការ​ដក​កងទ័ព​ថៃ ចេញ​ពី​វត្ត​កែវសិក្ខាគិរីស្វារៈ​នៅ​ក្បែរ​តំបន់​ប្រសាទ​ព្រះវិហារ​ផង​ដែរ៕